(Total of 13 votes)
Loading ...من فترة كنت بدي قول عن شي شغلة بتعبر عني لصديقة كان بدها ترسملي لوحة هدية…فبدون تردد كان ردي انو رسمي شي بيعبر عن الضياع لانو بيعبر عني حاليا…. بدي علقها على حيط بيتي ليصير عندي بيت او يبعتلي بنت حلال..او حتى حرام..عندها حيط… او بيت… ويفضل سيارة كمان……..بس انو يعني الفكرة بدي علقها عحيط…هلأ وقتها.. و هالحكي من شي تلت اسابيع كانت عاجبتني الفكرة…انو ضياع….بتختزلني بكلمة وحدة….و قلت بكرا بحط الكلب يلي بدو يكون عندي ليصير عندي بيت… او يطعمني بنت حلال او حتى حرام..عندها كلب بالاضافة للبيت و السياراة طبعا……..فبقعد بحكيلو عن ايام الضياع هي و انا عم دخن غليون…او يفضل مارايوانا…و بستذكر و بتذكر و بعيش بهل الذكريات يلي رح يضلو من هالايام الخرى…
اليوم سهران مع جاك و ماري جين و عم مزمز فيهون و تذكرت قصة الضياع يلي كانت ببالي من فترة… فصفنت فيها…ما كنت اتذكر الصورة يلي براسي عن الضياع… شو الضايع و شو مالو ضايع…ليش هيك وصفت حالي….اخت هالحالة….حسيت حالي ضايع و مالي عرفان ليش ضايع… المهم ما عرفت شو قصة الضياع..بس لساتني شايفها وين ما نظرت…مع مين ما بحكي..مع مين ما بسمع….الكل ضايع…و شي بيعرف انو ضايع و شي ما بيعرف…هو بالاخير بحسب تعريف كل واحد لمفهوم الضياع….يعني مثلا المؤمنين او المتدينين بيكونو عم يقولو ايه تلحس طيزنا شو علاك….باين الضياع تبعك…عم تقول كحول و منكرو العياذ بالله…و لسا بتقول مالك عرفان ليش ضايع…لك انت مو بس ضايع انت ضال كمان…الله يهديك و يعفو عنك و عن جميع امة سيدنا محمد…. طبعا شو بدنا بغير امم…ينمحقو…الله يخليلنا الجيوش الاسلامية يلي كنا رح نطلبها…. .
مفهوم الضياع بيختلف من انسان لاخر…و كل واحد بيشوف الضياع هو الشي يلي ما بيساويه لانو برأيو او بمعتقدو او بعقيدتو او ثقافتو هالشي تابو او حرام او حتى مكروه….فلما بيلاقي حدا عم يساويه بيصير بيعتبرو ضايع وممكن حيوان كمان…انو مافي اسهل من اطلاق و استعمال الاحكام يلي انزرعت فينا من قبل ما نولد بدال ما نستعمل مخ و منطق و نتجاوز اختلافات و خطوط ملونة و هالقصص يلي بتوجع الراس و مالنا متعودين عليها…اخي خلص انا ما دخلني.. انت بتشرب معناها انت ضايع و ضالل الطريق و الله يهديك و بيعطيني كتاب فيه خلطة اوراد و بيعطيني وصفة عن شو اقرا و كم مرة الصبح و قبل مانام و بنص الليل… انو جماعة الدين بأنواعه عندهون تعريف الضياع هو اي شي خارج الاطار تبع دينهون و يلي بيكون بيصنف من باب الملذات الدنوية التابوو حاليا و يلي رح تكون مسموحة بالحياة الابدية..و خلص غير هيك مافي ضياع….
هلأ اللادينيين اوالعرصات الملحدين بالنسبة لالهون الضياع مختلف…ممكن يشوفو انك انت ابو الصراط المستقيم هوالضايع…مو هنن…او مو انا… انت بالنسبة الهون ممكن يعتبروك انك مختزل كتير شغلات و مختار الطريق الاسهل و مؤمن و حياتك و اخرتك بجيبتك….و اذا انت كنت درويش ووضعك جربان بالحياة الدنيا…فعلى الاقل بتكون اخرتك بجيبتك…اخرتك يلي هي رح تستمر للابد..مو متل الحياة الدنيا الفانية يلي هي نقطة ببحر الاخرة.. …فيعني هنن ممكن يشوفوك انت الضايع و انت شايفهون ضايعين و حلها اذا بتحلها….
كلو شايف حالو صح و التاني ضايع…و كلو حشري و قلبو كبير و بدو يصلح التاني… انو بيجي بيقلك انو انا و الله بحبك و لانو بحبك بدي ياك تنهدى للطريق القويم….يلي بيصدف انو هو طريقي يلي ربيت عليه..مسلم او مسيحي….منشان هيك بدي ياك تنهدي ..و الله لانو بحبك….لو ما بحبك ما كنت حكيت و حاولت وعيك..
لك اخي انا مابدي ياك تحبني…بدي ياك تحترمني كأنسان و تحترم قراراتي يلي ما بتأثر على حياتك لا من قريب و لا من بعيد…. عيش و خلي غيرك يعيش…اذا مافيك تحبني بدون ماكون تفصيل على معاييرك معناها يا اخي مو ضروري تحبني…شو رأيك بس تحترم حياتي و معاييري و خلينا نكون بني ادميين عايشين بنفس البناية و الحارة و بس…خلص بقلبك انا ضايع و مابدك تفتح قوقعتك و تتقبل معاييري انت حر…بس احتفظ فيها لحالك…لا تخليها معيار لتعاملك معي كأخوك بالوطن او الحارة…اخي لما اجي اطلب ايد بنتك قلعني..بس اذا انا بحالي انت مادخلك… خلص كل مين على ضيعانو او عقلو الله يعينو…
اخي انت و ياه مختلفين خلص فهموها بقا…ما حدا بدو ياكل حدا و ماحدا لازم يفكر يهدي حدا…بهي الشغلة بالذات لازم نكون متل حارة كل مين دينو الو…و خلص…لاء نحنا شعب حشري للنخاع…فضوليين بطعمة و بلاطعمة…بيصير حادث مرور على طرف الطريق و ما بيعرقل المرور..بتلاقي السيارات صفت او بطئت منشان يتفرجو عالحادث و بيعرقلو السير…انو شوفي شوفي…لازم اعرف…اعرف بالتفاصيل…اي نعم تفاصيل ما بتفيدنا بفرنكين….بس فضوليين… شو طابخين الجيران…مين حاطط عينو على مين و مين ابنو عمل هيك و مين بنتو ارغلت مع هداك و مين لابس شو و ليش و شو و مين و يبعتلو حما…..منعرف معلومات عن الوسط المحيط بطعمة و بلاطعمة…و منقلك اخي نحنا شعب اجتماعي و قريب من بعضو… و عنا الكل بيهتم بالكل…مو متل الاجانب اذا الواحد وقع بالارض بنص الشارع ماحدا بينتكش فيه….ايه لكن عمي…نحنا شعب متكافل و متقارب اجتماعيا…
بس فضولنا بلا طعمة و ترابطنا الاجتماعي اثبتت الايام انو مالها متل ما مندعي…طبعا حقنا نكون هيك…صرلنا عايشين عيشة كلاب لعقود…فطبيعي هالفضول الفاضي….بس شايفين هالاجانب الكخة و الخروات و الاستعماريين و الكفار و الصليبيين….يلي احتلو العالم عسكريا و اقتصاديا و تقنيا… ماعندهون هالفضول…و لو كان عندهون فما بيتعدى مرحلة الفضول…..بيعرفو بشي اسمو حرية و مساحة شخصية…فتلاقيهون عايشين مع بعض و متألفين….
المشكلة..انو الشغلة عنا ما بتوقف عند الفضول و كترة الغلبة…لاء..بصير بدنا نحاول نغير و نحكم و نفرض…اخي هنن غلط و انا صح…منشان هيك انا بدي علمهون الصح لهل الحيوانات…
من ضمن تربيتنا العقائدية أنو بلدنا تحت مؤامرة ومننظر للغرب بشكل مريب و انو هنن ضايعين…بتسئلو للواحد شلون ضايعين و وصلو عالقمر و ممكن يوصلو عالمريخ من هون لكم سنة…بيقلك ايه هنن نهبونا و حاربونا و سرقو خيراتنا و ساوونا متخلفين بس بكل الاحوال…هنن كفرة فهل الشي ما بيهم…نحنا رح نجتر انجازاتهون بالدنية…ليش نوجع راسنا…يلي عندو عشي ليش يزفر ايديه….بس بالاخير نحنا النا الاخرة… اي نعم…شو مفكر…خليهون يضلو و يضيعو و يخترعو قد ما بيقدرو…نحنا النا الاخرة اخي الكريم…الحمدلله…فمن ضمن الشغلات يلي منحكيها عنهون انو هنن ماعندهون ترابط اجتماعي… هنن ما بيحبو بعض..مو متلنا اذا مرض عضو تداعا لهو الباقي بالسهر…
اي نعم مصدر معلوماتو هو الافلام….منشان هيك بيعرف او بيظن انو بيعرف عنهون كتير…او مصدر معلوماتو ابن جيرانو يلي ابن عمو بيعرف جار رفيقو يلي عاش برا…اخي حيوانات و مافيهون محبة لبعض…بتجي بتصفن…هلأ شلون العالم يلي منقفل عليهون انو بيهتمو بالحيوانات ممكن ما يهتمو بالبشر…شو قصة التطوع بالمطابخ العامة و الجمعيات الخيرية يلي عندهون و يلي مالها قائمة لا على فرض ديني و لا فرض عين..هيك هنن انشؤوها ليساعدو بعض…..على شو بتدل؟ اخي ما علينا…نحن ما منتعلم شي منهون لانهون ضايعين….
شلون ممكن البشر يبنو و يأسسو و يخترعو اذا ما قدرو يتعايشو مع بعض؟ كيف بدهون يشتغلو مع بعض؟
طيب بلاهون…كس اختون…بس شغلة وحدة يا ريت فينا نفكر فيها…شغلة انا برأيي مهمة كتير لتقدر العالم تتعايش و اذا مافي تعايش..مافي تطور اجتماعي و فكري يلي هو اساس اي تطور تاني…. بيقلولك في عنا تنوع عرقي و ديني…طيب مافي دين مالو موجود برا..بالعكس عندهون خليط اديان من كل انحاء العالم….و عرقيات مو سمعانين فيها بولا فيلم….شلون قادرين يتعايشو و يتطورو؟ اخي انسى القانون يلي بيحمي الافراد…. شلون هنن كمواطنين بيقدرو يعيشو و يتقبلو بعض و نحنا جحاش عنا ست سبع اديان و تلت اربع عرقيات و مالنا عرفانين شلون نعيش…
السبب هو كترة الغلبة تبعنا…طبعا مدعومة بجهل و قلة ثقافة قائمة على رخص البني ادم….و السلطة للاقوى…و الدين يلي بيقلك انو اذا في شي غلط غيرو بأيدك و اذا ما قدرت غيرو بلسانك… خلوط كل هالامور مع كترة الغلبة تبعك…بتعرف وين مشكلتنا…
اخي انت اذا ماشي و شفت واحد عم يبوس وحدة بالسيارة…غالبا رح تتصرف بأيدك و تنحمق و يطقو عروقك…مرة رفيق الي كان عرصة قبل ما يتزوج..اسمو ابو سيم.. من كم سنة كان عم يكجمج برفيقتو بالسيارة بالعتمة…شافهون شب ركض عليهون و كسر بللور السيارة و لو ما رفيقي شغل المحرك و دعس…كان تبهدل… مثال صغير…طيب هداك شو دخلو؟ مين عطاه الصلاحية…. ممنوع؟..طيب يتصل بالشرطة….حرام؟ يدعي عليهون و يستغفر ربو…غير هيك مو شغلتو يركض بدو يصحح الغلط بأيدو…….. بتشوف واحد عم يشرب…بتنبعص و بتنفر منو…لك يا اخي شو دخلك؟ انت رح تتحاسب عنو؟ بدك تعيش ببلد مافي منكر…روح عالسعودية…روح على افغانستان…روح على ايران…بس طول ما هالشخص ما عم يأثر عليك بالشي يلي بيعملو…ريح حالك و روح استغفر ربك…انت مقتنع انو هالشي غلط..ما تساويه…بس مالك على ربو شي..هو عاجبو هالشي…ما دخلك…
لما واحد متلك بيسافر عالغرب…بيعيش و بيقرر انو بعمرو ما عاد بدو يرجع لبلدو…طيب شلون قدران تعيش هنيك و عم تشوف كل المعاصي و الكفر حواليك… و ببلدك بدك تشتغل شرطي بجماعة النهي عن المنكر؟….بتشوف برا ناس قمة التعصب بس اخي عايشين بوسط ماحدا الو سلطة على حدا غير القانون…فخلص…بيشوف المعصية بيدير وشو و بيرجع عالبيت و بيضرب مرتو…بس ما بيقرب على غيرو…لانو بيعرف انو ما دخلو…هالنقطة هي بدنا نتعلمها…كل واحد على عقلو و على دينو الله بيعينو… انت عايش ببلد فيها اشكال و الوان من العقائد…او حتى عالم بلا عقائد…ما رح تكسب ثواب اذا حاولت تفرض الصح تبعك على غيرك بهل الطريقة… لك مو على اساس لو كنت فظا لانفضو من حولك؟ و لا الشغلة خيار و فقوس؟…
برا صارو زلم و اتطورو مو لانو سرقونا…و ليكهون كفار و مع هيك بتعيش طول عمرك عم تحلم تطلع تعيش ببلادهون…طيب شو السر…هنن بزمناتهون اتخانقو و حاولو يفرضو شغلات على بعضهون و تطابشو و دبحو بعض و بعدين وصلو انو شيه…شو منشان كل واحد يصطفل يساوي يلي بدو ياه..و منعمل قانون بيحمي حرية الكل و الجميع بكل اشكالها..و منترك عقاب الاخرة…للاخرة…..و نامو و فاقو و بنو وطن لالهون كلهون ولقو حالهون عالقمر….
لنقدر نصير بني ادمين بدنا نبطل نتدخل بالشاردة و الواردة بحياة العالم…بدنا نفهم انو كل واحد عليه من حالو بحياتو و قراراتو الشخصية….عندك شي بدك تقولو…بتناقشو و بدك تكون مستعد انك تسمع كلشي..لو فيه مساس لخطوطك الحمرا…ما عندك استعداد…معناها بدك تنقط البشرية سكوتك…و بالاخير الك الله اخي الكريم…عندك معتقد ذهبي…القانون بيحميلك حقك بممارستو…بس ما المفروض القانون يساعدك تفرضو على حدا…بدك القانون يفرض عالعالم شغلات هنن مالهون مقتنعين فيها…بدك تركب الة زمن و تسافرلك كم الف سنة لورا و تعيش بهداك الوقت…هالزمن مو زمانك…و مافيك تعيش بزمان الماضي بوقتنا الحاضر و تنظر على ربي و تقلي نحنا عم نعمل ثورة بدنا نبني وطن و خرى… بدك تبني وطن..بدك تشارك ولاد وطنك بكلشي…حقوقك لازم تكون متل حقوقهون..قانون وطنك لازم يعاملك بنفس الشكل يلي بيعامل غيرك..لازم يضمنلك حرياتك الكاملة تماما متل حرياتهون..بدون اي شروط…بدك تتقبل افكارهون و معتقادتهون مهما كانت مختلفة عنك..غير هيك انت واحد علاك و الثورة هي بس فرصة لتظهر عقدك تحت غطاء اعظم شي ممكن الانسان ينجزو…الوطن…و اذا منضل هيك…من طيزي اذا منصير بشر..او بصير عنا وطن..
و طبعا لا رسمتلي لوحة و لا بطيخ…و ضاعت الصفنة على ولاشي…
(Total of 7 votes)