عن الله والشعب التقي….

Posted on 22nd June 2015 in البعصة, واقع خرا

بخصوص الله والشعب التقي

بشعر بالغباء لما بضطر انو اشرح شغلات بحكيها بلغة الشارع المحكية…. بس انو هيك الشعب بدو…. فليش لاء…

شوف خيو…. انا لما بذكر اسم الله بدون ما حط سبع تسابيح و3 زغاليط هي مالها اهانة لربك…. ربك المفروض أكبر من هيك….

بس بتعرف مين عم يهين ربك؟

هدول يلي عم يوقفو عالمنابر وعم يدعو للقتل والسبي والابادة بأسمو….

يلي عم يقتلو بأسمو ويستبيحو انسانية البشر هنن يلي عم يهينو ربك مو انا….

هدول…. او انتو يلي عم تستبيحو دمي… او يلي عم تدعو ربكون انو يشلني ويطول بعمري منشان يطول عذابي…. انتو يلي عم تهينو ربكون…ابدا مو انا…. ربكون مالو متعطل ع كلمات تبجيل مني…. انا ما شوهتو بكلامي…انتو يلي عم تشوهوه….

هدول يلي يفتو بقتل الاخضر واليابس وهدول يلي عم يصفقولهون تحت اي مسمى هنن يلي عم يسيئو لربكون…مو انا الكافر الزنديق يلي غالبا عندي تفهم لمفهوم الهكون اكتر منكون لانو بالنسبة الكون مفهوم الخالق والعبد هو تماما متل مفهوم بشار والشبيحة تبعو…. بينما بالنسبة الي المفروض علاقة منبية عالاحترام…

يلي عم يهين ربكون هو المشايخ يلي عم يتّفهو الدين بشوية قوانين تافهة والها علاقة بشرب بول وخرا لانو كان في واحد متخلف حمار بالزمنات كان يشرب شخاخ البعير ويرضع من اختو وكان حباب ومتدين…. فصار قدوة بالنسبة الكون…

يلي عم يهين ربكون مو يلي عم يذكر أسمو بدون دبكة وزغاليط…. يلي عم يهين ربكون هو يلي عم يذكر ربكون ليبرر قتل انسان وبشر واخواتكون واهلكون تحت أي مسمى….

يلي عم يهين ربكون مو شخص ما بيأمن فيه…. يلي عم يهين ريكون هو انتو يلي حولتوه لاله قتل وابادة واستبداد…الله ماالمفروض يكون بحاجة لعدد كبير من العباد…. بس يمكن بحاجة لعباد يفهموه كرب مو كأب قائد مجرم….

يلي عم يهين ربكون هو مو انا لأنو مابأمن بوجودو…. يلي عم يهين ربكون هو انتو يلي حولتوه من الله خالق عادل لرئيس مستبد مجرم ما بيفرق شي عن أي قائد مستبد عم نحاربو…

يلي عم يهين ربكون هو انتو مو انا…. انا ببساطة مالي مقتنع فيه…وهالشي بيني وبينو…انتو ابدا مالكون علاقة…. هو ما كلفكون بهل الشي…. وانا اكيد عندي كلامي يلي فيني ناقشو فيه إذا كان موجود…. انتو يلي شوهتو وجودو وفكرة وجوده.

يلي عم يهين الله مو واحد كافر متلي ما بغبر ع صرمايتو…. بس انتو يلي عم تشبحو بأسمو….

يلي عم يهين الله هو أي واحد بيدعي الايمان فيه بس بأخر النهار ما عم يتصرف بأخلاق بتعكس اخلاق الله او تعاليمو….

يلي عم يهين الله هو داعش والنصرة واي مجرم بيقتل بأسمو…. ويلي عم يأيدو من المجرمين باسم الله تحت أي ذريعة…. حتى بدون توكيل من الله…. والتوكيل يلي عم يحملوه عم يكون من كلام الله يلي شوهتوه عبر الاف السنين….

انا الكافر يمكن عندي احترام لفكرة الله اكتر منكون كلياتكون…. لانو انا بشوفها فكرة كبيرة وعظيمة…. اي نعم مالي مقتنع فيها كفكرة…. بس شكي فيه يمكن يكون ببساطة انو مافي شي ممكن يكون عظيم لهل الدرجة…. بس انتو يلي مقتنعين بوجودو…. وعم تشنعو بالعالم بأسمو…

انا لما بعمل شي تجاه أي انسان…. ما بكون عم اعملو كرمال حسنة او لقاء اجر متلك…. انت ما بتساوي شاوي ببلاش…

وأخيرا…. من بينكون كلياتكون…. إذا في الله…. وفي يوم القيامة، انا الوحيد بينانكون يلي ما اسئت باسمو,,,ما قتلت بأسمو,,,ما بررت ظلم بأسمو….ما عزبت ولا قتلت بأسمو…ما اتقبلت ظلم او عدوان بأسمو…..

فإذا انت وغيرك مفكر انو إذا في الله فلأنك بتطج وبتركع وبتصوم وبتنافق طول حياتك بأسمو فمعناها رح تروح عالجنة…. فما فيني قلك غير أنك بتذكرني بجملة مكتوبة بكتابك المقدس ويلي بتوصفك تماما وبتقول انك  “كمثل الحمار يحمل أسفاراً”.

فأي نعم…انا حشاشجي الكافر…. بتحداك إذا في يوم قيامة…. أنك رح تكون عند ربك أحسن مني بشعرة…. لانو أساس دينك بلش بكلمة “أقرأ”…. وانتي تجاهلت هالشي وقررت تكون خاروف لا بتقرا ولا بتستعمل مخك…. واكتر الشي ممكن تساويه هو أنك تتبع عقلية القطيع يلي تربيت عليها….

أي نعم… انا ما بأمن بالله…او بوجودو…. وسبب كفري هو انت…يمكن…. لان شي متل الله…. بهل الدرجة العظيمة يلي بتحاول تورجيها…. مستحيل يكون إله لشي مريض متلك….

أي مافي الله…هي قناعتي… وإذا فيه…. في عندي كتير كلام ناقشو فيه…. بينما انت ما عندك شي غير إنك كنت خاروف تابع ورفضت تقرا وتستعمل مخك…يلي هو اول شي قالو لنبيك لما بعتلو الوحي وقلو….”أقرأ”…

فخراي عليك شو أنك بقرة…. او ليش بقرة…. خليني على كلام ربك… صحي أنك حمار….

وعيفونا يا…..فيني اتقبل اتعايش معكون هلأ….بس ابدأ ما بدي اتخيل قضي الأبدية مع هيك أشكال…ولو كانت جهنم وبئس المصير هو الخيار التاني…..

comments: 2 »

كل عام ومالنا بخير

Posted on 15th March 2014 in التحشيشة

 3 سنين كان عمري قبل 3 سنين من ولادة اخي الصغير……

3 سنين كانو طول فترة علاقة حبي الأول..

3 سنين درست بالاعدادي……

3 سنين….الخ الخ الخ….

صرلي شي نص ساعة صافن بدي اكتب شي ببلش ب 3 سنين..و ما عم بعرف… هالشي بعد ما فتتت عالفيسبوك من شوي وشفت النثر والشعر النبطي واللانمطي.. صور…و كتير شغلات عم تبلش ب 3 سنين وتقلب بعدين شعر لهاني شاكر  وشوي لفهد بلان.. طبعا ما ننسى الياسمين والكنافة ….فحسيت انو هيك لازم كلياتنا اليوم نكتب شي بهل الحدث الجلل….هيك تماما متل ما كنا قبل كم سنة… و لاربعين سنة الا شوي قبلها…بس وقتها يمكن ما كان لا 15 و لا 18…محسومة كانت و اعتمدو 8… وهيك كل سنة ب 8 اذار تعو يا سوريين احتفلو بالثورة…ع راسنا بسطاركون و الله يديمكون… و شكرن كتير على سد الفرات وباقي المنجزات…. يلي حطيتولنا ياهون بكل كتاب من اول صف لاخر عمرنا….

ضلينا عم نحتفل فيها ونحنا مالنا فيها لاناقة ولاجمل…انو هيك لازم لانو غير هيك مناكل خرا بشكل او بأخر و بموضع او بأخر..هيك كنا جحاش مثلن…انو خلص هيك مصيرنا و يا اخي احتفال…مننزل لنحتفل و منفركها عالبيت…. صار عنجد 8 اذار يوم مننتظرو بدون ما نحس……..هلأ ماكنا نحس لانو ماكنا لاقيين نحش… ..بس يعني يمل من تكرار واجترار الماضي واسبابو….ومشيت القصة وتطورنا لنتأقلم معها وصارت مسلمة الشغلة و هيك يا اخي نحن احسن شعب بالعالم بس هيك ظروف هل البلد والمنطقة… الظروف خلتنا شعب جحش…بس نحن لسا احسن شعب….و المعنى بقلب القائل…و بتزبط بكل مقارنة…من احسن طيارين لاحسن أطباء لاحسن خضرجية …منضل احسن الشي بس انو الظروف يا اخي الله يلعنها ساوتنا اجحش شي…مو بأيدنا….قدرنا بعدي اسمو هالرب…..و ضلينا شي أربعين سنة هيك….

خلصنا….

او انو هيك فكرنا…..

وفجأة ليكو اجا ادار و بلشنا نحضر الكلمات…احتفال صغير كرمال ما يزعلو الشهداء….عالهسي يعني…ع أساس هنن رح يزعجهون صوت الاحتفال…. فلازم نكتب شي سنستف..ويفضل يكون حالم او عاطفي…… و بكرا بيخلص الاحتفال ومنرجع عالدوام….

لحد هلأ بعد 3 سنين…ما غيرنا غير التاريخ…….

3 سنين و لساتنا احسن شعب….بس يا اخي يلعن الظروف…ظروفنا و حظنا الخرا… عم تعرقل انتصارنا….كس اخت هالظروف يلي لاحقتنا من وقت ما بلش 8 ادار بهديك الحقبة لليوم….ليك شو عم نساوي…اخي الظروف فرضت علينا… بس نحن احسن شعب…

3 سنين تغير كتير…. كتير كتير……تغيرت البلد….يمكن راحت البلد حتى…. تغيرت الحياة… تغير شغل كتيرين منا….تغيرت أولويات كتير مننا…… تغيير نمط حياتنا….. مع اختلاف درجة التغيير….لانو يلي نزل فوق راسو برميل….اساسا ماعاد لازمو هالتغيير……..تغيرت اهدافنا….تغيرت علاقاتنا……..تغير كتير شغلات….بس نحنا ما تغيرنا….لساتنا احسن شعب…بس  يلعن هاالظروف يلي ساوتنا اجحش شعب…..نحن بس مشكاتنا مع هالظروف…. كلو مؤامرة….سواءا جماعة 8 ادار..و لا جماعة 15 ادار…. كلو مؤمن بالمؤامرة….و ع شوي عنجد رح صدق المؤامرة……

خلص خيو…انا شو فيني اعمل بهل المؤامرة؟ اكبر مني ومنك…بركي السنة الجاية احسن…ضلينا نقول بركي السنة الجاية احسن كل سنة ب 8 ادار لمدة أربعين سنة…. هلأ ما صرلنا غير 3 سنين عم نتأمل انو السنة الجاية تكون احسن…. و تماما متل الأربعين السنة يلي قبل…السنة الجاية دايما عم تجي اسؤأ…..خوفي من صبرنا….صبرنا قبل و ماصار شي…خايف نرجع نصبر هلأ كمان….ونضل مقتنعين انو نحنا احسن شعب….و نضل عم نلزقها بالظروف والمؤامرة….و نصبر ونصبر…و نضل ما عم نتغير….ونضل احسن شعب…و كل واحد فينا هو احسن واحد اذا مو بالعالم…..فبين ولاد وبنات الوطن العربي….بس يلعن الظروف…

اذا انا لسا انا وهي لسا هي وانت لسا انت…. و فلاني لسا عم يموت وفلانة لسا عم تختفي…. شو منكون ساوينا؟ اذا بدال مااكره هدول صرت بكره هدول…و اذا بدال ما كنت تابع لهاد صرت تابع لهداك….شو منكون عملنا؟ اذا لسا منبرر لهدول بدال ماكنا نبرر لهدنك…اذا صرنا نخاف من هدول بدال ما كنا نخاف من هدول…..اذا كنا منزاود باسم النظام لنمشي امورنا…وهلأ صرنا منزاود باسم الثورة لنمشي امورنا…..شو منكون نحنا؟….

الثورة ما بتغير….بعمرها ماغيرت…الثورة بتعطي فرصة…الفرصة ممكن تكون هيك..و ممكن تكون غير هيك….التغيير هو يلي بيخلقو الشعب…..بيخلقو التغيير يلي ببلش من راس كل واحد….اذا ما تغيير يلي بالراس…رح يضل يصير تغيير… تغيير بالشكل واللبس والمظهر.. بس نفس البئس والذل والامراض والكره والحقد..

مابدي اكتب امنياني للسنة الجاية اليوم….مابدي عظّم أي يوم بشهر ادار قبل ما كون شايف منجزات هاليوم بعيوني..  مابدي تدور فينا الأيام ولاقي ابني عم يحفظها من “كتاب القومية” يلي ممكن ما يتغير فيه غير اسمه و يصير اسمو “كتاب الوطنية”…ما بيهم شو صار تعداد الأموات بسوريا…ما بدي رقم منشان الطم عليه اليوم…طول ما العد لسا شغال….اذا في شي بينلطم عليه هو نحنا يلي لسا عايشين….ممكن نضل عم نعد لعشر سنين.. اذا هالرقم بس ليخلينا نزعل ونلعن ونكره ونحقد….ومابخلينا نتطلع ع حالنا ونشوف لسا ما تغيرنا..رح يجي يوم يلي ولادنا او ولادهون يبلشو تاريخ جديد …بادار او بغير ادار…

انا عن نفسي ما تغيرت…. لساتني شايف انو نحنا شعب جحش…مع استثناءات…بس اذا بدي احكي نسبة مئوية ومنقرب لاقرب عدد صحيح…منطلع شعب جحش بالمجمل….

لساتني ما تغيرت…لسا بشوف انو الثورة كانت ولازالت ضرورة…لسا شايفها كانت فرصة وابدا مارح قول يا ريت ماصارت…. مابدي نكرر غلط أهلنا…تخرب هلأ وتعمر بعدين…احسن ما كانت ضلت عم تخرب ع مهل….و تتدمر ع راس ولادنا بعدين…..

لساتني بشوف انو هي الثورة هي اهم حدث بحياتنا….النفضة يلي صارت بحياتنا ممكن هلأ عم تصدمنا….بس مع الوقت تصحينا…. هلا شو الوضع بيكون لنصحى….ما بعرف….بس انو عيش و في بصبوصة ضو بأخر النفق…احسن من انو عيش وعرفان انو بأخر هالنفق…..في قطار رح يطلع فيه ابني او بنتي ليلاقو حياة افضل ببلد افضل… لانو جيلي صحلو التغيير…و ما عرف يتغير او بس عرف يتغير للأسوأ

و كل عام ومالنا بخير….اطلاقاً

comments: 10 »

وضربة….تقش نيعك

Posted on 31st August 2013 in السكرة

في كذا نقطة بدي احكي فيها…..او بالأحرى بدي ابحت…. رح حاول نظم افكاري….بس بعد تسع بيرايات و اربع شطات…غوود لاك يعني…. المهم…ان ما قدرت نظم افكاري….رح حط ملخص كتير صغير بالاخير….

اول الشي….انا بصراحة مارر بمشاعر مختلفة…ما عم اعرف… و لا ابدا ما قصدي على مشاعري بخصوص موضوع الضربة…هي رح تكون النقطة التانية او التالتة…حسب كم سيجارة بقيان يعني….المشاعر المختلفة يلي مارر فيها حاليا و عم تعملي ازمة بتحديد الهوية الشخصية هي انو يا اخي ما عم بفهم ع ربنا….. عن جد…

ما عم بفهم ع ربنا…. قال شو…. ” لا للحرب في سوريا”….

اول ما شفت واحد من رفقاتي حاطت الصورة عالفيسبوك….قلت لعمى…… ..انو معقول كانت الكهربا مقطوعة عندو صرلها سنتين…و لا فات ع تواليت من سنتين و نص والمسكين معو مشكلة بالامعاء تبعو و هلأ لحتى طلع ودري…. هيك فتت بالحيط رسمي…. بس انو بصراحة…موقف بهنيك عليه….يعني نيال بلدك على هالوطنية…بس لو كنا كلنا متلك كنا متل هلأ نحنا طلعنا عالنيزك لنفرطو وما نطرناه لينزل لعنا يفرطنا….. يا زلمة لوهلة حسيت بالخجل من نفسي… انو انا ما خطرلي حط صورة بروفايلي و اطلب انو يوقفو الحرب بسوريا….سنتين و نص و كل كم يوم بغير صورة بروفايلي.. ساعة بحط حالي و انا ماسك سيجارة…ساعة و انا ماسك شو اسمو…و ساعة لما بكون عم فرشي سناني و ساعة لما بكون لابس فستان سهرة و ساعة لما بكون شالح فستان السهرة…هيك احترت شو حط صور ع بروفايلي…بس ولا مرة خطرلي اخد موقف رجولي وطالب بوقف الحرب بسوريا….مو لشي…بس بالاخير انو اعتبرني حمار بعيد عنك….بس صورة البروفايل او أي علاك بحطو عالفيس بوك لا يتعدى مجال انو هالسبع رفقات يلي عندي يعرفو موقفي..او علاكي…و هالسبعة اولريدي بيعرفو موقفي….اي نعم تسعة منهون حذفوني منشان هالموقف…بس انو بيعرفو نون ذا ليس…

شعور هالخجل من الذات لازمني اخر كم يوم…. بعدين استجمعت قوتي و قررت شارك مع هالصديق بالحملة لوقف الحرب بسوريا….بعتلو قلتلو حبيب…انت ملكنا…ع راسي ضيعتك….قام انبعص و قلي انو هو من جوات السوار…. حقك علينا, قلتلو…هو تعبير مجازي…ضيعة و لا سور كلو معبا حيطان يعني…مرقها….شو حبيب القلب…شلون فيني شارك بهل الحملة…و هل يا ترى فينا نوصل صوتنا لعند هالجحش ليوقف الحرب…. قلي طبعن… عم ننظم مظاهرة بواشنطن كرمال هالقصة…..و رح نعمل ضغط اعلامي عليه لحتى يوقف الحرب…. انا هون كنت بقمة الذهلان….انو معقول هالجحش يأثر فيه مظاهرة بواشنطن؟ اول ربع ساعة ما فهمت بصراحة….محسوبكون غبي شوي… بعدين قلتلو والله يا معلم فكرة….بهل الطريقة منضمن انو هالجحش ما يقدر يقصف و يعتقل المتظاهرين لانو بعاد عنو شي سبع تالاف كيلو متر…. حلال عليك…ايه هيك هاه… بيعجبني التفكير الاستراتيجي…..

و انا ناطر التعليمات منشان ادلو دلوي بهل الحملة….حذفني….

…. خلينا نحكي جد…. بدك توقف الحرب؟ الحرب يلي لسا ما بلشت و يمكن ما تبلش و يلي حتى لو بلشت رح تستهدف كم مطار و كم قاعدة عسكرية صرلهون سنتين عم يقتلو ولاد بلدك؟  شو الخلفية تبعك مثلا؟ يعني موقفك هاد انساني؟ وطني؟ شو ربو هالموقف؟ انا معك انو ما بدنا حرب…بس انت فين و الحب فين….بحب خبرك انو تلت بلدك صارت عالارض…. بعرف يمكن انت عم تعاني من ضغط نفسي هائل خلال اخر سنتين و نص من صوت الصواريخ يلي عم تنزل ع راس المناطق القريبة عليك….عنجد بتفهمك….يعني يخلصونا بقا…. يستعملو الكيماوي و يقتلوهون عالساكت…ما عم نعرف ننام…..هداك اليوم الله وكيلك على ضرب و قرع ما قدرنا نكمل برتية الشدة…. الكيماوي ظريف… مالو صوت و بينضف عالسريع…..اخي ما بدنا حرب..

انا بفهم انزعاجك…. لانو هلأ الاميركان اذا ضربو…رح يضربو بصواريخ صوتها اعلى بكتير…… بس ليك… ابدا ما تقول انو قلبك عالبلد….بتعرف..البلد هي مالها عبارة عن أراضي و حجار…البلد هي بناسها…و ناس بلدك صرلها تلت سنين عم تتدبح و تنقصف و يتنكل فيهون….يمكن انت ما بتتخيل انو صوت القذيفة يلي عم يزعجك عم يعمل بلاوي بيلي عم ينزل فوق راسهون…مالك فاضي تفكر بعرف…بالاخير في مسؤوليات براسك و برتية الشدة ما فينا نخسرها….فشرت عين محمد وجوزيف يغلبوني انا وسميح…

ما فيك تكون انساني فجأة… ومافيك تدعي حب الوطن كوطن بما يشمله من ارض و مي و في وناس وانت صرلك سنتين ساكت او الاضرب عم تغض نظر عن المجازر…. مافيك ترفض الصاروخ الأميركي…لانو هيك رباك أستاذ القومية…و تتقبل الصاروخ السوري ينزل فوق ابن بلدك لانو هيك رباك بسطار العسكرية…. مافيك تتقبل انو كل هالالاف يلي عم تنقتل على ايدين جيش بلدك هنن مجرمين…كل هالاطفال يلي غالبا ما عم تفكر تطلع ع صورهون غير لما بيطلعو ع شاشة الإخبارية السورية و تصدق انو ابن طنعشر سنة هو قائد خلية إرهابية…انا بعد سنتين و نص و لساتني عم ارفض فكرة انك ممكن تكون لهل الدرجة غبي….بدي قول انك طائفي…بس بجي بشوف رفيقك محمد يلي مشاركك بالحملة….بقول معناها الطايفة ما دخلها…. في عندك مشكلة…. هي المشكلة يلي تربيت عليها ببيئتك… يلي كلياتنا تربينا عليها…. الدين لله والوطن لبشار…. قسم كبير مننا نفض راسو من فترة طويلة و باالنتيجة نزل علينا غضب بشار و دمر نص البلد…

شوف انا بشار بنظري مجرم متل هدول يلي عم تشوفهون عم يقطعو روس بني ادمين لانو ما بيعرفو عدد ركع صلاة الضهر… هدا الفرق الجوهري بيني و بينك… انا ما برر لمجرم مين ما كان…و حتى لو كان الانسان البرئ يلي عم ينقتل ما بيعنيلي شي..او يلي عم يقتلو من ضيعتي او مدينتي او قريتي او طائفتي او حارتي…المجرم مجرم…….انا ضد بشار…و ضد داعش…انت ضد داعش و مع بشار… فبحياة جارتك حياة…كيف بدك ياني شوف فيك ذرة إنسانية اذا هيك؟ انا ببداية الثورة قلت انو انت لو بتأيد بشار…مافيني قول عليك خائن….بس اكيد فيني قول عنك جحش… و بعد كل هالفترة…لساتني عند رأيي… لما تكون البلد ملكي…ساعتها بيحقلي خون يلي بدي ياه….بس بتعرف انو البلد والوطن هو ملك الكل و كل واحد بيحبو بطريقتو….بس لما تصفق لمجرم….مالك خائن بس اكيد مالك انسان….

خلصنا من هالجحاش تيع اوقفو الحرب على سوريا….خليني احكي رأيي بهل الضربة المتوقعة….

انا ضد الضربة….اذا رح تكون ضربة صغيرة رفع عتب…. انا ضدها اذا ما رح ينتج عنها بالمدى المتوسط سقوط هالمجرم….انا ضدها ذا كان هدفها هو حفظ ماء الوجه تبع الغرب…يلي سكت عن كل هالمجازر و عن الالاف المؤلفة يلي ماتو بكل أنواع القتل والأسلحة…انا ضدها اذا هي كرمال عين الفين شخص ماتو بالكيماوي وما بتاخد بالاعتبار المية وخمسين الف يلي ماتوا بغير طرق….انا ضد أي ضربة بتعطي للاسد انتصار ولو كان ورقي….ولي…اذا الأسد والجيش المجرم تبعو عم يعملو احتفالات لما عم يسترجعو بناية بعد سبع تشهر من القصف الجوي والبري والبحري ليقتلو سطعشر واحد معهون نقيفات متخبيين جوا……شلون اذا اميركا بتضرب كم صاروخ  على المستودعات وكم مركز عسكري النظام صرلو كم يوم عم يفضي فيهون…..عليي الطلائع لبعد الفين سنة طائفة الممانعين رح يعملو قرآن خاص فيهون يحكي عن النبي بشار يلي هزم كل قوى الشر يلي مسيطرة عالعالم….لك حتى بدون ما يحفر خندق…كل يلي رح يعملو انو رح يطوبز و ياكل الضربة…و النصر عندو و عند الشعوب العربية تقاس بنجاة القائد….بتتذكرو حرب إسرائيل مع حزب الله بالالفين و ستة…مات مدري كم الف لبناني و تدمر نص لبنان…و إسرائيل خسرت تسع دبابات و نص و عشرين جندي…بس العرب كلهون اعتبروه نصر ساحق لحزب الله…..كلو لانو حسن نصرالله ضل عايش….تخيلو هالسيناريو لما عم نحكي ع اميركا….انا ضد أي ضربة بتحقق هالشي لبشار او لغيرو…

انا بعرف انو أي ضربة غربية فهدفها مصلحة اميركا….و بعرف هالشي مولاني فتح متلكون….بس يمكن لانو ما ضل مناسبة الا والبيت الأبيض قال انو أي رد رح يكون بناءا ع مصالح اميركا القومية……يعني ع شوي حسيت أوباما خايف نكون ما فهمنا هالنقطة و رح يعملها غنية….انو يا ناس…انتو متل طيزي…تموتو كلكون….بحفض الكلب…بس أي رد بعملو هو كرمال مصلحة اميركا القومية….

انا ضد أي ضربة ما بتوصلنا لنهاية بشار المجرم….. وانا مع أي ضربة بتوصل للخلاص منو…..اعتبروني خائن اعتبروني خرا اعتبروني شو ما بدكون…تلحسو طيزي قشة لفة…. انا ما بميز بين جنسية الصاروخ….بس اكيد رح ميز بالهدف تبع الصاروخ…لما الهدف بيكون مجرم صرلو سنتين عم يقتل ولاد بلدي…انا رح صفقلو…..و خصوصا اذا كان ممكن يخلصنا من هالمجرم ويوقف القتل بعد فترة…..ما حدا يقلي شفنا العراق وليبيا…لانو بصراحة اذا شايف العراق وليبيا وعم تقارن بسوريا…معناها الحكي معك ضياعة وقت…انت عيارك فيديو يوتوب مدتو دقيقتين عم يتغنى بياسمين بلدك و عم يتجاهل انو ياسمين دمشقك صار لونها احمر من كترة دم السوريين يلي سال….. العراق ماصار فيه ضربة جوية…العراق صار فيه غزو بري…و مع هيك…يلي عم يقتل العراقيين هلأ هنن العراقيين والإيرانيين…الاميركان مشيو من زمان و القتل لسا شغال….في عندون مشكلة طائفية…اميركا مو سبب هالمشكلة…سبب هالمشكلة هو معاوية وعلي ويزيد ومحمد وعمر وهالملايين من الخواريف يلي لهلأ ماسكين هالصراع وماشيين بعد كل هالزمن….

ليبيا شو صار فيها؟ مشاكل؟ أي مين قال انو لما بتجيب شعب متخلف صرلو عايش تحت الصرماية مليون سنة و بتشيل هالصرماية فجأة بصيرو بني ادمين و بيبلشو يخترعو طيارات وسيارات؟ المشي للامام مو بالضروري يكون سريع…مالك عم تلف صاندويشة…

 حياة الشعوب ما بتنقاس بسنة و لا تنين و لا عشرة… الانتقال من دولة فاشلة لدولة ناجحة هي عملية طويلة….بس لازم تبلش….فيك تكون اناني و تقول انا عايش ببلد خرا بس اموري زابطة شو بدي بوجع الراس….بس يستر ع عرضك ما تغنيلي غنية وطنية…. قول انك اناني…بس ما تجيب سيرة الوطنية….الثورة…اي ثورة…ما بتعطي ثمارها خلال كم يوم او كم سنة….فيه مشاكل و عقد اجتماعية لازم تتعالج عبر فترة من الزمن….فيك تأجل معالجتها وتعيش بحاوية زبالة اسمها وطن…او فيك تعاني فيها شوية و تشوف انو ولادك وولاد ولادك رح يعيشو بوطن عن جد وطن…الوطن يلي طول عمرك بتحلم فيه…الوطن يلي وقفت عند باب السفارة ساعات لتتركو وتطلع على وطن تاني بتحلم فيه…..هالوطن يلي عم تحلم فيه ع فكرة مر بهل الشي يلي هلأ شايفو…..

الخلاصة….انا مع أي ضربة بتوصل لسقوط الأسد….نقطة وبس…ما رح اعمل متل كتيرين و اعمل انو م